త్వరలో తెలంగాణ

దగ్గర్లోనే ఉంది.. ప్రత్యేక రాష్ట్రంతోనే సింగరేణి అభివృద్ధి
బ్రహ్మరాక్షసుడిలా కార్మికులకు అండ.. ఆదాయపన్ను మినహాయింపునకు కృషి
మనకార్మిక సంఘం భిన్నంగా పనిచేయాలి: టీఆర్‌ఎస్ అధ్యక్షుడు కేసీఆర్
ప్రకృతి సంపదైన సింగరేణి.. వలస పాలకుల కారణంగా వివక్ష ఎదుర్కొంది. కార్మికులు అనేక
ఇబ్బందులు పడ్డారు. జాతీయ సంఘాల ముసుగులో కొందరు కోట్లాది రూపాయలు సంపాదించుకున్నారు. రబ్బరు చెప్పులతో వచ్చిన వాళ్లు ఇప్పుడు కార్లల్లో తిరుగుతున్నారు. రూ. 500 కోట్ల లాభాల్లో ఉన్న సింగరేణిలో కార్మికులు బట్టలు మార్చుకునే గదులు కూడా సరిగ్గా లేవు. ఆంధ్రవూపదేశ్‌లో ఉండి సింగరేణి మునిగింది. ప్రత్యేక రాష్ట్ర ం ఏర్పాటు కాగానే.. సింగరేణి విస్తరిస్తుంది..

- కేసీఆర్

హైదరాబాద్, జూలై 11 (టీ మీడియా): తెలంగాణ రాష్ట్రం సిద్ధించే రోజు దగ్గరలోనే ఉందని టీఆర్‌ఎస్ అధ్యక్షుడు కల్వకుంట్ల చంద్రశేఖరరావు విశ్వాసం వ్యక్తం చేశారు. ఈ మేరకు తనకు స్పష్టమైన సంకేతాలు ఉన్నాయన్నారు. తెలంగాణ భవన్‌లో బుధవారం జరిగిన తెలంగాణ బొగ్గు గని కార్మిక సంఘం విజయోత్సవ వేడుకల్లో ఆయన మాట్లాడారు. తెలంగాణవాదం ఎంత గొప్పదో సింగరేణి ఎన్నికల్లో స్పష్టమైందని తెలిపారు. తామూ తెలంగాణవాళ్లమేనని ఏఐటీయూసీ ఎంత చెప్పినా కార్మికులు నమ్మలేదన్నారు. ఎవరు ఎంత దుష్ప్రచారం చేసినా టీబీజీకేఎస్‌నే గెలిపించిన కార్మికులకు ఆయన కృతజ్ఞతలు తెలిపారు. తెలంగాణ అంటేనే టీఆర్‌ఎస్ అని ప్రజలు విశ్వసిస్తున్నారని, అందుకు ఈ గెలుపు నిదర్శనమన్నారు. తెలంగాణ కోసం 12 ఏళ్లుగా టీఆర్‌ఎస్ పడుతున్న తపనను, నిజాయతీని ప్రజలు గుర్తించారని, అందుకే హిమాలయాలంత ఎత్తుకు ఎదిగామన్నారు.

వచ్చే సింగరేణి ఎన్నికల నాటికి తెలంగాణ రాష్ట్రం ఏర్పాటవుతుందని, టీబీజీకేఎస్ అప్పుడు 45 వేల మెజార్టీతో గెలుస్తుందన్నారు. ఉద్యమానికి అండగా నిలిచిన కార్మికులకు వారి సమస్యల పరిష్కారం కోసం బ్రహ్మరాక్షసుడిలా అండగా ఉంటానని తెలిపారు. సంఘం గెలుపుతో బాధ్యత పెరిగిందని, సింగరేణి కార్మికులను యాజమాన్యం బాధ పెట్టకుండా చూడాలని కార్మిక సంఘం నాయకులకు సూచించారు. మేనేజ్‌మెంట్ మంచి మాటతో వినకుంటే దానిని ఎదిరించాలన్నారు. కార్మికులకు ఎక్కడ ఏం జరిగినా అక్కడికి సంఘం నేతలు వెళ్లి వారి సమస్యలను పరిష్కరించాలన్నారు. ఇందుకోసం సంఘం తరుపున ఒక కారు కొనుగోలు చేయాలని సూచించారు. కార్మికులందరికీ చదువురాదని, వారికి అన్ని విషయాల్లో అవగాహన కల్పించేందుకు ప్రత్యేకంగా చర్యలు తీసుకోవాలన్నారు. కార్మికుల కాలుకు ముల్లు గుచ్చుకుంటే సంఘం నాయకులు పంటితో పీకేస్తారని చెప్పారు.

గత యూనియన్ల పనితీరుకు, మన పనితీరుకు తేడా చూపించి గౌరవం పెంచుకోవాలని, వారి హక్కులు కాపాడాలని సూచించారు. కార్మికులు వారం రోజులు పనికి పోకున్నా జీతం కట్ కాకుండా చూడాలని అన్నారు. ఆర్నేళ్లకోమారు తెలంగాణ భవన్‌లో సంఘం రివ్యూ మీటింగ్ ఏర్పాటు చేస్తామని తెలిపారు. కార్మికుల ఆకాంక్ష మేరకు పనిచేసి వచ్చే సాధారణ ఎన్నికల్లో సింగరేణి ప్రాంతంలో ఎమ్మెల్యేలను గెలిపించుకోవాలని సూచించారు. ప్రకృతి సంపదైనా సింగరేణి వలస పాలకుల కారణంగా.. వివక్ష ఎదుర్కొందని, కార్మికులు ఇబ్బందులు పడ్డారని తెలిపారు. జాతీయ సంఘాల ముసుగులో కోట్లాది రూపాయలు సంపాదించుకున్నారని ఆయన ఆరోపించారు. రబ్బరు చెప్పులతో వచ్చిన వాళ్లు ఇప్పుడు కార్లల్లో తిరుగుతున్నారని తెలిపారు. రూ. 500 కోట్ల లాభాల్లో ఉన్న సింగరేణిలో కార్మికులు బట్టలు మార్చుకునే గదులు కూడా సరిగా లేవన్నారు.

ఆంధ్రవూపదేశ్‌లో ఉండి సింగరేణి మునిగిందన్నారు. ప్రత్యేక రాష్ట్ర ఏర్పాటు కాగానే.. కలలు గన్న సింగరేణి విస్తరిస్తుందన్నారు. రాష్ట్ర ఏర్పాటు జరిగిన మరుసటిరోజునే.. డిఫెండెంట్ విధానంలో ఉద్యోగాలు ఇప్పిస్తామని చెప్పారు. తెలంగాణ ఏర్పాటు కాగానే.. 35 నుంచి 40 కొత్త మైన్స్ ఏర్పాటవుతాయన్నారు. ఉద్యోగులు పెరుగుతారని, కార్మికులకు సచివాలయ ఉద్యోగుల గదుల్లాగా ఏర్పాటు చేయిస్తామని తెలిపారు. మిలట్రీ ఉద్యోగుల మాదిరిగా కార్మికులకు ఆదాయపన్ను నుంచి మినహాయింపు కలిగేలా తెలంగాణ ముఖ్యమంవూతిని సంప్రదించి కేంద్ర ప్రభుత్వంతో మాట్లాడుతానని చెప్పారు. సమ్మె కాలంలో కోల్పోయిన రెండు నెలల వేతనాన్ని మిత్తితో ఇప్పిస్తానని హామీ ఇచ్చారు. 42 రోజులు సమ్మె చేసినా ఇప్పుడు బొగ్గు ఉత్పత్తిని పెంచుతున్న కార్మికులను ఆయన అభినందించారు. సంఘం అధ్యక్షుడు కెంగర్ల మల్లయ్య అధ్యక్షతన జరిగిన సభలో ఎమ్మెల్యేలు నల్లాల ఒదేలు, అరవింద్‌డ్డి, కావేటీ సమ్మయ్య, మాజీ ఐఏఎస్ అధికారి ఏకే గోయల్, మధుసూధన్‌రావు, తుల ఉమ, రామ్మోహన్, సతీష్‌కుమార్, రాంరెడ్డి పాల్గొన్నారు.

Most Viewed galleries