హైదరాబాద్, జూన్ 28 (టీ మీడియా): బెయిల్ ఫర్ సేల్ కేసులో అరెస్టయిన మాజీ జడ్జి పట్టాభి రామారావును కస్టడీకి అనుమతించాలంటూ ఏసీబీ అధికారులు దాఖలు చేసిన పిటిషన్‌పై గురువారం ఏసీబీ కేసుల ప్రత్యేక కోర్టులో వాదనలు పూర్తయ్యాయి. ఏసీబీ తరఫు న్యాయవాదులు వాదనలు వినిపిస్తూ సీబీఐ కేసుల ప్రత్యేక కోర్టు జడ్జిగా ఉన్నపుడు పట్టాభి రామారావు ఓబుళాపురం మైనింగ్ కంపెనీ కేసులో అరెస్టయిన కర్ణాటక మాజీ మంత్రి గాలి జనార్దన్‌డ్డికి బెయిల్ మంజూరు చేశారన్నారు. ఈ బెయిల్ మంజూరు చేయటానికి పది కోట్ల రూపాయల డీల్ జరిగిందని చెప్పారు. ఈ డీల్‌లో అంతిమ లబ్ధిదారు పట్టాభి రామారావే అని పేర్కొన్నారు. మరిన్ని వివరాలను సేకరించాల్సి ఉన్నందున పట్టాభి రామారావును మూడు రోజులపాటు కస్టడీకి అనుమతించాలని కోరారు. కాగా, పట్టాభి రామారావు తరఫు న్యాయవాదులు దీనిని వ్యతిరేకించారు. ఇరుపక్షాల వాదనలు విన్న అనంతరం జడ్జి తుది నిర్ణయాన్ని శుక్రవారానికి వాయిదా వేశారు.