సందమామా

పల్లవి: సందమామా సందామామా
మబ్బుపూనుక మసకబారి-ఓ సందమామా
బిడ్డనాకు కానరాక
నేటికెన్ని దినములాయె-ఓ సందమామా

॥ సంద॥

చరణం: నింగిలోని జాబిలమ్మ-నేలదాకా చెయిజాపగ
కాలమే నిన్నెత్తుకోని- జోలపాట పాడుతుండగ
నిన్ను జూపె గోరుముద్దలు- ఓసందమామా
వెన్నముద్దలని పెడితీ- నా సందమామా

॥ సంద॥

ఆడజన్మకు శాపమోపూ-నీలి మబ్బులు కమ్ముకోగా
ఆకాశమంత సగము-అమాస చీకటవ్వగ
పోరుజెండై ఎగిరేబిడ్డా- ఓ సందమామా
హోరుగాలికి మబ్బులు తొలిగే- నా సందమామా

॥ సంద॥

ఊరునివూదల జోగుతుండగా-నేను బిడ్డయాదిలుంటె
ఉట్టిమీద కూర అన్నము-తిన్నట్టుగ కలలు గంటి
పిల్లి అడుగుల సప్పుడైనా- ఓ సందమామా
నీ తల్లి మనసు జల్లుమానె-నా సందమామా

॥ సంద॥

అడవిగాసిన వెన్నెలయ్యి-అక్కడే నువు జూసినావా
అరుగుదాక వచ్చిపోయి-పేరు జెప్పగ మర్చినావా
నేలరాలిన బిడ్డపైనే-ఓ సందమామా
నువు జాలికొంగు పర్సినావా-నా సందమామా

॥ సంద॥

కన్నబిడ్డను తెచ్చి ఇమ్మని- నిన్నడగలేను
అరుణతారల వెల్గునేమో-పేరుపెట్టి పిలువలేను
నీటిలోని కలువలన్ని- ఓ సందమామా
వాకిట్లో పూసినాయి- నా సందమామా
సందమామ సందామామా
మల్లెజాజులు ముంగిట్లో- ఓ సందమామా
తెల్లవారగ తెలుపే ఎరుపై
రాలి రంగవల్లులాయె నా సందమామా

-మిత్ర
(అమరులైన బిడ్డలకు-వూపేమపంచిన తల్లులకు)

Most Viewed galleries