ఈ మధ్య దాదాపు అన్ని కంపెనీలు ‘వర్క్ ఫ్రమ్ హోమ్’ అని ఉద్యోగులకు మంచి అవకాశాన్ని ఇస్తున్నాయి. సాఫ్ట్‌వేర్ కంపెనీలు అయితే ఈ విధానాన్ని ఎప్పటి నుంచో అమలు చేస్తున్నాయి. హాయిగా ఇంట్లో ఉంటూ పనులు చేసుకోవచ్చని చాలా మంది సంబరపడుతున్నారు కూడా. ఎన్నిసార్లైనా టీ బ్రేక్ తీసుకోవచ్చు. కాసేపు టీవీ చూడొచ్చు. మనం ఏం చేస్తున్నామో అని తొంగి చూసేవాళ్లుండరు. ఇంతకంటే స్వర్గం ఉంటుందా అనిపిస్తోంది కదా! దీనివల్ల సంబరం కంటే.. సమస్యలే ఎక్కువ అంటున్నారు నిపుణులు. ముఖ్యంగా ఇది స్త్రీలకు పెద్ద సమస్యేనట.

ఈ టెక్నాలజీ పనినైతే సులభం చేశాయి, కానీ ఒత్తిడిని వెంటపెట్టుకొచ్చాయి మరి. ఇంట్లో ఉంటే అన్ని పనులు చేసుకోవాలి. ఆఫీసు పనులకంటే కూడా ఇంట్లో పనులను పూర్తి చేయడానికే ఎక్కువ సమయాన్ని వెచ్చించాల్సి వస్తుంది. దాంతో సరైన సమయానికి ఆఫీసు పని పూర్తి కాదు, టెన్షన్ మొదలు. పక్కన నుంచి పిల్లల గోల. ఇలా అన్ని కలిపి ఆ కోపాన్ని ఎవరో ఒకరి మీద తీసేస్తారు. అప్పుడు ఇంట్లో కూడా గొడవలు షురూ. అంతా కలిపితే నష్టమే కానీ లాభం ఉండదు. కాబట్టి ఇంట్లో ఉండి పని చేసేకంటే ఆఫీసులో ఆ కొన్ని గంటలు కష్టపడితేనే బెటర్ అట!